Dwyrain Canolbarth Lloegr (EMSOU)

Uned Gweithrediadau Arbennig Dwyrain Canolbarth Lloegr (EMSOU) yw'r cydweithrediad rhanbarthol mwyaf yn y wlad. Mae'n cynnwys tîm profiadol a medrus sy'n gweithio'n arloesol gyda'i gilydd ar ran y pum heddlu yn Nwyrain Canolbarth Lloegr i fynd i'r afael â'r troseddwyr mwyaf treisgar, difrifol a threfnedig ar lawr gwlad ac ar-lein.

Mae’n cydweithrediad yn cynnwys nifer o alluoedd ac unedau sy'n ymroi i fynd i'r afael â ladd a thrais difrifol, troseddau cyfundrefnol, a therfysgaeth ac eithafiaeth. Rydym hefyd yn darparu gwasanaethau fforensig y rhanbarth ac yn cynnal adolygiadau achos ac adolygiadau thematig mewn ymgais i ddod â chyfiawnder mewn troseddau sydd heb eu datrys, adnabod arferion da a gwella perfformiad.

Troseddau cyfundrefnol

Ein Huned Troseddau Cyfundrefnol Ranbarthol (ROCU) oedd prif gydweithrediad y wlad a chafodd ei sefydlu yn gynnar yn y 2000au i ddarparu tactegau cudd yn erbyn troseddwyr difrifol a chyfundrefnol ar ran heddluoedd Swydd Derby, Swydd Gaerlŷr, Swydd Lincoln, Swydd Nottingham a Swydd Northampton. Dros y blynyddoedd, mae’n galluoedd wedi tyfu i ymgorffori deallusrwydd a swyddogaethau ymchwil, gan baratoi'r ffordd ar gyfer cydweithredu tebyg ledled Cymru a Lloegr.

Ynghyd â'n syndicadau deallusrwydd a gweithrediadau, mae gennym bellach dimau yn canolbwyntio ar droseddau ariannol ac adfer asedau, deallusrwydd carchardai, troseddau seiber, twyll, a gwasanaethau digidol a thechnegol. Mae'r rhain i gyd yn gweithio ar drywydd grwpiau troseddu cyfundrefnol sy'n ymwneud â chyflenwi cyffuriau a drylliau, troseddau mewnfudo cyfundrefnol, masnachu pobl ac ecsbloetio (megis llinellau cyffuriau ac ecsploetio plant yn rhywiol), gwyngalchu arian, llygredd carchardai a throseddau sydd wedi’u galluogi gan seiber ac sy’n dibynnu ar seiber.

Gwrthderfysgaeth

Mae EMSOU hefyd yn gartref i Uned Deallusrwydd Gwrthderfysgaeth Dwyrain Canolbarth Lloegr, sy’n cael ei hadnabod fel CTP EM. Mae'r tîm wedi ymroi i fynd i'r afael a monitro bygythiad terfysgaeth yn Nwyrain Canolbarth Lloegr, ac mae'n rhan o'r rhwydwaith plismona gwrthderfysgaeth cenedlaethol.

Mae gan yr uned swyddogion a staff sy'n gweithio o fewn pob un o bedwar maes strategaeth CONTEST y Llywodraeth, sy'n gweithio'n agos gyda phartneriaid mewn diogelwch cenedlaethol, asiantaethau a sefydliadau eraill gorfodi'r gyfraith i ymlid y rhai sydd â'r bwriad o achosi niwed, yn ogystal â diogelu a pharatoi ein cymunedau a'n busnesau yn erbyn y bygythiadau presennol.

Rydym hefyd yn rhan o ymdrech aml-asiantaeth i atal y rhai sy’n fwyaf agored i gael eu hecsbloetio rhag cael eu radicaleiddio, gan annog pobl i weithredu'n gynnar i ddiogelu eu hanwyliaid.

Troseddau mawr

Mae’n Huned Troseddau Mawr yn gweithio fel tîm rhanbarthol i ymchwilio i farwolaethau amheus, achosion cymhleth a throseddau difrifol eraill sy'n digwydd yn Nwyrain Canolbarth Lloegr. Mae'r uned yn cynnwys cnewyllyn o Swyddogion Cyswlltol Teulu (FLOs) sydd wedi’u hyfforddi ac sy'n rhoi cymorth proffesiynol i berthnasau dioddefwyr y troseddau mwyaf treisgar, yn ogystal â darparu pwynt cydlynu'r rhanbarth os bydd digwyddiad mawr.

Gwasanaethau Fforensig

Mae'r tîm rhanbarthol hwn yn darparu gwasanaethau fforensig i'n heddluoedd yn Nwyrain Canolbarth Lloegr. Gan weithio ar y cyd â Cellmark, mae’n gwyddonwyr a staff heddlu sydd wedi'u hyfforddi'n fanwl yn archwilio olion bysedd, DNA, darnau esgyrn, samplau gwaed a mwy mewn ymgais i adnabod pobl a datrys troseddau, gan ddarparu tystiolaeth amhrisiadwy ac adroddiadau arbenigol i sicrhau euogfarnau a dedfrydau carchar.

Uned Adolygu Rhanbarthol

Cafodd y tîm hwn ei sefydlu yn 2010, ac mae'n cynnal adolygiadau o ymchwiliadau mawr, digwyddiadau critigol ac ymchwiliadau neu themâu eraill a nodir, megis troseddau rhywiol difrifol a phobl sydd ar goll ac sy’n wynebu risg uchel, gyda'r bwriad o adnabod arferion da a meysydd i’w datblygu. Drwy eu profiad eu hunain – a thrwy fanteisio ar arbenigedd o fannau eraill o fewn y rhanbarth ac yn allanol – mae'r tîm hefyd yn helpu Uwch Swyddogion Ymchwilio (SIOs) yn ystod ymchwiliadau byw, gan ddarparu cymorth mewn amser real i gau ymchwiliad.

Cysylltu â ni

Gallwch gysylltu â thîm cyfathrebu EMSOU drwy’r ebost. I gael rhagor o wybodaeth, gallwch edrych ar ein gwefan a’n dilyn ni ar Twitter.