Mae gan gyfarwyddiaeth troseddau economaidd rhwydwaith y ROCUs nifer o dimau arbenigol sy'n gweithredu ar ran yr heddluoedd i ymchwilio i droseddau ariannol a bachu asedau troseddwyr.

Mae eu timau'n cynnwys ystod o alluoedd sy'n ymchwilio i grwpiau troseddu cyfundrefnol sy’n ymwneud â throseddau ariannol, gan gynnwys ymchwiliadau arwyddocaol ar wyngalchu arian.

Mae unedau ymchwilio twyll yn ymchwilio i dwyll arwyddocaol, gyda llawer ohonynt yn aml yn lledaenu'n ehangach ledled y Deyrnas Unedig a thros y môr.

Mae timau neilltuol eraill yn ceisio defnyddio’r Ddeddf Enillion Troseddau (POCA) i sicrhau bod troseddwyr yn colli eu henillion anghyfreithlon, er mwyn sicrhau nad yw troseddu'n talu.

Enillion troseddau

Enillion troseddau yw'r enw sy’n cael ei roi i arian neu asedau sy’n cael eu sicrhau gan droseddwyr yn ystod eu gweithgarwch troseddol. Mae pwerau o dan y Ddeddf Enillion Troseddau (POCA) yn caniatáu i ROCUs geisio atafaelu'r asedau hyn i sicrhau nad yw troseddu'n talu.

Mae Unedau Troseddau Economaidd y ROCUs yn cynnwys ymchwilwyr ariannol arbenigol sydd â nifer o ffyrdd i dargedu'r rhai y credir eu bod wedi elwa o weithgaredd troseddol.

Sut y gall deddfwriaeth POCA gael ei defnyddio

Gorchmynion atal – yn cadw asedau rhywun sydd dan amheuaeth nes bod gorchymyn atafaelu wedi’i dalu'n llawn.

Gorchmynion atafaelu – yn ei gwneud yn ofynnol i ddiffynnydd a gafwyd yn euog dalu swm o arian ar unwaith neu o fewn cyfnod penodol o amser.

Adennill sifil – Mae enillion troseddau yn gallu cael eu hadennill mewn achos sifil yn erbyn eiddo y mae modd dangos ei fod wedi cael ei brynu drwy ddefnyddio arian anghyfreithlon.